Willemstad – Na nòmber di Minister Suzy Camelia-Römer di Tráfiko, Transporte i Planifikashon Urbano, Obra Públiko ta anunsiá ku riba djaluna dia 9 di yanüari ta kuminsá ku e siguiente fase di mantenshon di Sta. Rosaweg. E fase aktual ta trata e parti di Sta. Rosaweg entre Barbouqet i Marchena Hardware.

E trayekto di mantenshon ta forma parti di e plan di mantenshon total di Sta. Rosaweg, kaminda a drecha den e aña ku a pasa algun parti kaba. No ta posibel pa sera un kaminda importante manera Sta. Rosaweg den un tiru pa mantenshon. P’esei e mantenshon ta tuma lugá den diferente fase.

E trabounan aktual ta tuma 40 dia di trabou pa kaba. Negoshinan i kasnan ta aksesibel na tur momentu di tur dos banda di kaya durante e trabounan, mirando ku e aseranan ta basta hanchu.
Mantenshon na e partinan aki di Sta. Rosaweg ta enserá ku mester kita e asfalt i e fundeshi di e kaminda i saka e bantnan kantu di kaya. Despues ta traha un fundeshi nobo, pone bantnan nobo i asfaltá e pida kaminda di nobo. Ta basha asfalt kantu di kaya pa asina mehorá e asera tambe.

Pa habitantenan i komersiantenan i nan klientenan, semper tin opshon pa por yega nan destinashon. Pa tráfiko normal ku tin un otro destinashon, tin bòrchinan ku ta mustra outomobilistanan riba e desviashonnan. Obra Públiko, kontratista CWM i polis tékniko ta pidi komprenshon pa eventual molèster di e kambionan temporal.

 2017-01-06 - Obra Publiko ta sigui ku trabounan di mantenshon na Sta.Rosaweg