alle kompas

Pa basha un edifisio den sentro di siudat abou, sea kompletamente òf parsialmente, mester di un “sloopvergunning” konforme artíkulo 4, insiso 3 di E.O.P.

Pa bin na remarke pa un “sloopvergunning” mester entregá un petishon na Servisio pa Planifikashon Urbano (ROP) personal òf via e-mail na info.rop@gobiernu.cw. E petishon mester kontené lo siguiente.

• nòmber i informashon di kontakto;
• si e petishon ta wòrdu hasí dor di un apoderado: nòmber i informashon di e apoderado i un outorisashon por eskrito di e doño dje edifisio;
• adrès i informashon kadastral di e tereno kaminda e konstrukshon ta situá;
• mapanan di konstrukshon di e edifisio; si ta un parti so ta bai basha abou, mester inkluí un indikashon di kua parti lo basha abou;
• indiká si a pidi òf lo pidi tambe un pèrmit di konstrukshon pa konstruí riba e tereno konserní;
• un splikashon kòrtiku di e manera ku lo bai basha e konstrukshon abou, inkluyendo medidanan ku lo tuma pa minimisá molèster pa besindario;
• si pa motibu di e ubikashon di e konstrukshon por tin peliger pa hende, edifisio òf kayanan den besindario, splika ki medida lo tuma pa evitá peliger.

Pa protehá e bista di sentro di siudat, e “sloopvergunning” ta wòrdu mará na e kondishon ku mester konstruí un edifisio riba e tereno ku a bira bashí i ku mester hasi esaki denter di un término rasonabel.

Pa sierto trabounan i otro tipo di aktividatnan, ku no ta trabou di konstrukshon, den un área di Konservashon òf un área pa Parke mester di un asina yamá pèrmit di instalashon (“aanlegvergunning”), konforme artíkulo 9, insiso 4 i artíkulo 10, insiso 3 di EOP

E trabou i aktividatnan aki en prinsipio ta regardá kosnan ku ta kuadra den un área di Konservashon òf pa Parke manera un trankè, ruta pa kana keiru, banki i mesa pa piknik, mirador, indikadó di kaminda, bòrchi, baki di sushi, reforestashon, lokual por inkluí egalisá e suela, traha kaminda, kap palu, yerba i mata i instalá konstrukshonnan riba tera. Trabounan ku ta ripití frekuentemente por wòrdu inkluí den un solo bia den e pèrmit di instalashon.

No tin mester di un pèrmit di instalashon pa un simpel trabou òf aktividatnan di mantenshon òf pa sierto aktividat i trabou­nan di menor importansha. Loke nos ta komprendé bou di un simpel mantenshon ta dependé sinembargo di e kaso spesí­fi­ko i ta p’esei ta rekomendabel en todo kaso pa tuma kontakto ku Servisio pa Planifikashon Urbano (ROP) promé ku kuminsá ku mantenshon.

Mester entregá un petishon pa un pèrmit di instalashon delantá por eskrito na Servisio pa Planifikashon Urbano (ROP) usando e formulario di petishon. Print e formulario na momento ku kaba di yen’e i entreg’é personalmente òf un scan via e-mail na info.rop@gobiernu.cw.

E petishon mester kontené tur informashon i dokumentonan nesesario pa por hasi un bon evaluashon.

Si tin intenshon di konstruí, indiká esaki bon kla den e petishon. Pa konstrukshon di edifisio di mes mester pidi naturalmente un pèrmit di konstrukshon na Servisio pa Planifikashon Urbano (ROP).

E petishon mester inkluí lo siguiente:

• Mester entregá prueba di e derecho ku e kliente tin riba e tereno ku e ke bai desaroyá (sea ku e ta privá, di hür, na èrfpagt òf si ta trata di un tereno pa kual tin un konvenio di maneho). Ta supliká pa entregá e pruebanan korespondiente.
• Si akaso e informashon ta disponibel, inkluí un bon deskripshon di e tereno. Indiká pues kual ta e karakterístikanan di e sitio, p.e. su flora i fauna i karakterístikanan natural ku ta resaltá manera roi, seru i kueba. Esaki ta yuda Servisio pa Planifikashon Urbano (ROP) pa atendé bo petishon ku mas diligensia.
• Un mapa mas eksakto posibel di e área riba un skal di por ehèmpel 1:10000 i/òf mapanan detayá di e área unda ta bai desplegá sierto aktividat riba un skal di por ehèmpel 1:5000. E mapa(nan) mester duna un bon bista di e área den su totalidat i di e sitionan unda ta bai hasi algu.
• Duna un deskripshon mas detayá posibel di e trabounan i aktividatnan ku ke realisá. Mester di un pèrmit di instalashon pa e siguiente aktividatnan i trabounan:

1. trabou di mina, koba, halsa, egalisá òf di eksploshon;
2. instalashon òf enduresimentu di kamindanan sea pa medio di asfalt òf di otro material i otro forma di enduresé tereno pafó di kurá di edifisionan;
3. instalashon di konstrukshonnan bou òf riba tera, instalashon di artefakto o aparatonan pafó di kurá di edifisionan;
4. trabou i aktividatnan ku por influenshá situashon di e fluho di awa den i riba tera i e nivel di awa den tera;
5. instalashon di tur tipo di waf i lugá pa mara boto;
6. kapmentu i bashamentu abou di palu i tur sorto di mata pafó di kurá di edifisionan;
7. plantashon pafó di kurá di edifisionan;
8. instalashon di lugá pa tira sushi i metal bieu.

• Duna un bon deskripshon di e sitio kaminda ke bai hasi algu, kon un ke otro lo bai keda realisá, kuantu aktividat i trabounan lo keda realisá, den ki periodo i/òf ku kua frekuensia, ki material lo usa i kiko ta e midínan (largura, haltura, hanchura). Ta rekomendabel pa akinan duna por eskrito mas tantu detaye ku ta posibel i pa indika un ke otro riba mapa.
• Splika e motibu dikon realisashon di e aktividat i e trabounan deseá ta importante.

Algun kondishon general ku ta konta pa kada pèrmit di instalashon:

1. Mester hasi uso di un mulina di betòn pa traha i basha material di betòn òf di semènt; e no tin mag di wòrdu traha riba tera.
2. Mester deshasí di sobrá di semènt, asfalt, desperdisio di konstrukshon i otro sushi direktamente despues ku kaba di traha.
3. Material di konstrukshon manera santu, asfalt, semènt, piedra i greistenchi mester keda wardá den lugánan será di moda ku nan no por lanta stòf i mester despachánan direktamente despues di trabou.
4. No por sende kandela abiertamente.
5. Doño di e pèrmit di instalashon mester pone esun ku ta enkargá ku realisashon di e aktividat i e trabounan debidamente na altura di e kondishonnan. E doño ta keda responsabel pa tur loke ta stipulá den e kondishonnan.

E base pa por otorgá òf rechasá e pèrmit i pa por stipulá e kondishonnan ta:

• e balornan partikular den e área manera e vege­tashon, karakterístikanan di paisahe i e animalnan ku t’ei presente, i
• otro puntonan di importansia manera e fluho di awa riba tera, inklinashon di seru, posibilidat di eroshon, etc.

Mester evaluá ku e aktividat òf e trabounan no tin konsekuensia sea direkto òf indirekto ku lo hasi daño na e balornan eksistente di naturalesa, di historia, di kultura i/òf di paisahe òf na e posibilidat pa reskatá e balornan aki. Si e daño kompará ku e interes metí ku realisashon di e aktividat i e trabounan ta disproporshonal, mester rechasá e petishon pa e pèrmit di instalashon. E kondishonnan den e pèrmit di instalashon semper lo tin komo meta pa limitá e daño aki mas tantu posibel.

Nòrmalmente e pèrmit di instalashon ta bálido pa un sierto tempu i mester kuminsá den un sierto lapso di tempu ku e aktividat i e trabounan indiká den e pèrmit.

No por traha sin un pèrmit di instalashon pero tampoko no mag di desviá di dje. Si esaki sosodé tòg, esaki ta un infrakshon ku por wòrdu kastigá ku dos luna será òf un but di maksimal NAf 5000 konforme artíkulo 21 di EOP i artíkulo 32, insiso 2 di EROC. Si ripití e infrakshon e straf ta bira dòbel.

Por revoká e pèrmit di instalashon si:

1. e petishonario a duna informashon i dokumentashon robes òf inkompleto;
2. no a kuminsá traha den e tempu stipulá;
3. no ta aktua segun e kondishonnan bou di kua a otorgá e pèrmit di instalashon.

Segun e lei di Òrdu Públiko, Landsverordening Openbare Orde (link) artíkulo 15, insiso 1, sub a, pa pone kualke opheto den área públiko mester di un pèrmit. Esaki ta inkluí den awa.

Petishonnan pa pèrmit mester wòrdu entregá na Servisio pa Planifikashon Urbano (ROP) personal òf via e-mail na info.rop@gobiernu.cw. Mester inkluí informashon eksakto di e sitio kaminda lo pone e opheto, inkluyendo e midínan pa por kalkulá kuantu m² di área públiko esaki lo tuma. Tambe mester inkluí un potrèt òf un visualisashon di e opheto ku lo pone den área públiko.

Lo evaluá e petishon a base di e siguiente puntonan, ku ta sirbi pa sigurá òrdu i siguridat den área públiko, konforme e lei di Òrdu Públiko:

• e opheto no mag kousa daño físiko riba kaya òf ophetonan den área públiko,
• e opheto no mag forma un estorbo pa e uso efisiente di área públiko,
• e opheto no mag opstakulisá e aksesibilidat di e área públiko,
• e opheto no mag forma un opstákulo pa siguridat den tráfiko,
• e opheto no mag stroba e mantenshon di e área públiko,
• e opheto no mag forma molèster òf sushedat,
• e opheto no mag hasi daño na e bista di e área públiko,
• e opheto no mag tin un kontenido ofensivo, skandaloso òf violento (hende sunú, sèks, rasismo, arma, etc.);
• e material ku lo usa mester ta duradero i fásil pa mantené.

Si ta trata di un opheto den sentro di siudat, Servisio pa Planifikashon Urbano (ROP) lo evaluá, banda di e puntonan ariba menshoná, tambe entre otro:

• si e opheto ta pas i ta duna un balor agregá na e sitio kaminda ke pon’e;
• e grandura i koló ku lo usa no ta kita atenshon for di e edifisionan monumental.

Si ta trata di un opheto di arte, Servisio pa Planifikashon Urbano (ROP) lo pidi Ministerio di Enseñansa, Siensa, Kultura i Deporte konseho en konekshon ku e balor kultural i balor artístiko.

E gastunan mará na un pèrmit ta reglá den Eilandsverordening leges, precariorechten en retributies (link)  artíkulo 67 i ta varia dependé di e opheto.

Pa ankra un opheto den suela mester pidi un pèrmit pa trabounan di kobamentu (“graafvergunning”) na Servisio pa Obra Públiko (OW). Klek aki pa mas informashon.

Segun e lei di Òrdu Públiko, Landsverordening Openbare Orde artíkulo 15, insiso 1, sub a, pa pone ophetonan den área públiko mester di un pèrmit. Esaki ta konta tambe pa ophetonan manera stèngel, trapi, etc. na un sitio di konstrukshon i tambe waya, hèki, etc. pa sera e área di trabou.

Mester hasi un petishon na Servisio pa Planifikashon Urbano (ROP) usando e formulario di petishon. Print e formulario na momento ku kaba di yen’e i entreg’é personalmente òf un scan via e-mail na info.rop@gobiernu.cw.

Mester inkluí informashon eksakto di e sitio kaminda lo pone e ophetonan, inkluyendo e midínan pa por kalkulá kuantu m² di área públiko esaki lo enserá.

Tratamentu di un petishon pa un eksonerashon i/ òf pèrmit ta reglá den “ i ta wòrdu tratá mas lihé posibel, pero pa mas tardá 8 siman despues di entrega di e petishon.

Promé ku otorgá e pèrmit, Servisio pa Planifikashon Urbano (ROP) lo tuma kontakto ku Servisio pa Obra Públiko (OW) pa konseho. Alabes OW lo ta enkargá ku kòntròl pa kumplimentu ku e pèrmit.

E kliente mester mèldu na Polis tambe pa si mester desviá tráfiko.

E gastunan mará na un pèrmit pa e tipo di ophetonan aki ta reglá den Eilandsverordening leges, precariorechten en retributies artíkulo 20, sub b, i artíkulo 67, insiso 1, sub a, i ta konsistí di:

• NAf 40 na leges;
• NAf 3 pa m² pa siman òf NAf 10 pa m² pa luna na precario; den kaso ku e superfisie di área públiko ku ta wòrdu okupá dor di e stèngel, trapi, hèki, etc. ta nada òf masha tiki, lo kobra solamente mitar di e montante di precario.

Segun e lei di Òrdu Públiko, Landsverordening Openbare Orde artíkulo 16, insiso 1, ta prohibí pa pone propaganda den òf visibel for di área públiko. P’esei bo mester haña un eksonerashon.

Tambe, segun e lei di Òrdu Públiko, artíkulo 15, insiso 1, sub a, pa pone ophetonan den área públiko mester di un pèrmit.

P’esei pa pone opheto den área públiko ku tin propaganda riba dje, mester di un eksonerashon i un pèrmit. Pa un opheto riba tereno privá ku tin propaganda riba dje kual ta visibel for di área públiko, mester di solamente un eksonerashon.

Mester hasi un petishon pa un eksonerashon òf un pèrmit na Servisio pa Planifikashon Urbano (ROP) usando e formulario di petishon. Print e formulario na momento ku kaba di yen’e i entreg’é personalmente òf un scan via e-mail na info.rop@gobiernu.cw, inkluyendo e dokumentonan menshoná den e “checklist” na final dje formulario.

Tipo di propaganda ku no mester di un eksonerashon i/òf pèrmit

• Propaganda riba un edifisio òf tereno, pa produktonan ku ta ser produsí òf bendí den e edifisio òf riba e tereno, òf negoshi ku ta ser praktiká einan.
• Un bòrchi ku anunsio di: Ta Bende/Ta Hür, ku un superfisie máksimo di 1,5 m².
• Un bòrchi temporal na un sitio di konstrukshon ku ta duna informashon tokante e proyekto, basta e bòrchi no ta iluminá.
• Propaganda temporal, pa entre otro un evento. Wak e foyeto “Propaganda pa Evento” pa mas informashon.
• Propaganda en konekshon ku elekshon. Wak e foyeto “Propaganda Polítiko” pa mas informashon.

Tur petishon pa un eksonerashon i/ òf pèrmit pa propaganda ta ser evaluá a base di e nota “Beleid voor Reclameuitingen”. Den e nota por lesa tambe tur rekisito ku ophetonan di propaganda mester kumpli ku n’e.

Tratamentu di un petishon pa un eksonerashon i/ òf pèrmit ta reglá den “Procedure ontheffing reclame” i “Procedure aanvraag voor vergunning ten behoeve van activiteiten in, op of aan de openbare weg”  i ta wòrdu tratá mas lihé posibel, pero pa mas tardá 8 siman despues di entrega di e petishon.

E gastunan mará na un pèrmit pa teras ta reglá den Eilandsverordening leges, precariorechten en retributies artíkulo 20, sub d, i artíkulo 67, insiso 1, sub q i ta konsistí di leges i precario. Ta paga precario solamente si e opheto ta riba tereno di gobièrnu.

Prekario:

NAf. 15 pa kada ½ meter pa aña òf NAf. 15 pa kada ½m² pa aña (e montante mas haltu).
Aki nos ta wak e área di suela ku ta wòrdu okupá dor di e opheto di propaganda (e largura kompleto di e opheto òf e superfisie di e área di suela ku ta wòrdu okupá dor di e opheto)
Por ehèmpel, si e rant abou di e bòrchi tin un hanchura di 10m:
10 x 2 x NAf 15 = NAf 300 pa aña
Komo ku e pèrmit ta pa dos aña, e total ta bira NAf 300 x 2 = NAf 600.

Tantu un pèrmit komo un eksonerashon pa propaganda ta bálido pa 2 aña. Mester hasi petishon pa un pèrmit i/òf un eksonerashon nobo por lo ménos 8 siman promé ku esun aktual kaduká.

Si Servisio pa Planifikashon Urbano (ROP) konstatá ku e konstrukshon por forma un peliger si e no wòrdu konstruí sufisiente sólido, por eksigí un pèrmit di konstrukshon. Servisio pa Planifikashon Urbano (ROP) lo evaluá esaki a base di e grandura dje konstrukshon, e tipo di material ku lo usa, e volúmen i e diseño, i lo informá e kliente si un pèrmit si konstrukshon ta nesesario.

Pa un bòrchi LED di propaganda, semper mester pidi un pèrmit di konstrukshon.

Pa ankra e opheto di propaganda den suela mester pidi un pèrmit pa trabounan di kobamentu (“graafvergunning”) na Servisio pa Obra Públiko (OW). Klek aki  pa mas informashon.

Pa bin na remarke pa un teras den área públiko, mester di un pèrmit konforme lei di Òrdu Públiko,  Landsverordening Openbare Orde artíkulo 15, insiso 1, sub e.

Un pèrmit pa teras no ta nesesario si:

• e teras no ta den, ni kantu di kaminda públiko;
• e teras ta kantu di kaminda públiko pero e no ta forma parti di kaminda públiko (e ta den un kurá òf ta riba un stupi elevá ku ta forma parti dje edifisio konserní; un teras asina ta forma parti di e lokalidat konserní i no ta forma parti di área públiko.

Mester hasi un petishon na Servisio pa Planifikashon Urbano (ROP) usando e formulario di petishon (Print e formulario na momento ku kaba di yen’e i entreg’é personalmente òf un scan via e-mail na info.rop@gobiernu.cw.)

Huntu ku e formulario mester entregá lo siguiente.

• Un kopia di e “horecavergunning” òf “standplaatsvergunning” (si ta trata di un kantina móbil riba tereno propio) òf prueba risibí na Bentana di Informashon ku a hasi petishon pa esaki;
• Un plan di e área (“situatietekening”) ku indikashon di e sitio deseá i e midínan deseá pa e teras;
• Midí i material di tapasolo, protekshon kontra bientu i pòchi di mata, si ta bai usa esakinan;
• Si ta bai konstruí esakinan, mester entregá e diseño. Dependiendo di e grandura dje konstrukshon, por eksigí un bouwvergunningpèrmit di konstrukshon. Servisio pa Planifikashon Urbano (ROP) lo informá e kliente si esaki ta nesesario.

No ta permití pa ankra stul i mesa den e suela. Pa ankra otro opheto, manera tapasolo, den e suela mester pidi un pèrmit pa trabounan di kobamentu (“graafvergunning”) na Servisio pa Obra Públiko (OW). Klek aki ( https://vvrp.cw/kompa/pidi-permit-pa-trabounan-di-kobamentu/) pa mas informashon.

Pa pega ophetonan na un monumento protehá, mester pidi un “momentenvergunning”.

Tur petishon pa pèrmit pa teras ta ser evaluá a base di e nota “Criteria voor de uitgifte van terrasvergunningen”. Den e nota por lesa tambe tur rekisito ku un teras mester kumpli ku n’e.

Tratamentu di un petishon pa un pèrmit pa teras ta reglá den “Regeling terrasvergunning” i ta wòrdu tratá mas lihé posibel, pero pa mas tardá 8 siman despues di entrega di e petishon.

E gastunan mará na un pèrmit pa teras ta reglá den Eilandsverordening leges, precariorechten en retributies artíkulo 67, insiso 1, sub e, i ta konsistí di NAf 15 pa m² pa aña.

Un pèrmit pa teras ta mará na e kompania pa kua el a wòrdu pidí, i pues por pasa pa un doño nobo.

No ta permití pa hür e pèrmit na un tersera.

E pèrmit ta bálido pa 1 aña. Mester hasi petishon pa un pèrmit nobo por lo ménos 8 siman promé ku e pèrmit aktual kaduká.

Segun e lei di Òrdu Públiko, Landsverordening Openbare Orde (link) artíkulo 70, insiso 1, e doño di un edifisio mester sòru pa su edifisio tin un number klaramente visibel pegá na dje, kual ta optenibel na

Mester hasi un petishon na Servisio pa Planifikashon Urbano (ROP) usando e formulario di petishon. Print e formulario na momento ku kaba di yen’e i entreg’é personalmente òf via e-mail na info.rop@gobiernu.cw.

Algun eksigensia na momento ku ta bai yena e formulario ta lo siguiente:

• Number di e pèrmit di konstrukshon di e kas/edifisio. Na momentu ku e persona no por proba ku e ta den posishon di un pèrmit di konstrukshon pa por registrá su adrès, lo e mester hasi un petishon pa legalisá su edifisio. E persona mester entregá un petishon na Servisio pa Planifikashon Urbano (ROP) pa legalisá su edifisio, personalmente òf via e-mail na info.rop@gobiernu.cw, huntu ku e siguiente dokumentonan: 2x bestek tekening na schaal 1:100, 2x situatieschets na schaal 1: 1000; Papel di tereno: meetbrief, kadastral legger, akta notarial, kontrato di e tereno duná den hür (“huurgrond overeenkomst”); Karta propio ku ta pidi pa legalisashon di e edifisio i kua funshon esaki tin.
• Kopia di sédula òf pasport.
• Si no ta doño di e edifisio ta hasi e petishon, e mester apoderá un persona ku karta i kopia di sédula.
• Imágen di unda e edifisio ta lokalisá (“situatieschets”). Esaki por ku un foto di ‘google map’ òf por hasi e petishon na ofisina di Kadaster.

Na momento ku kaba di trata e petishon, e kliente por tuma e registrashon di su adrès (number i resibu) na bali Servisio pa Planifikashon Urbano (ROP), pagando NAf 12,50, konforme Eilandsverordening leges, precariorechten en retributies (link)  artíkulo 20, sub a.

E kliente mester warda e resibu bon i mustra esaki ora ku e ta registrá su adrès na Servisio Públiko “Kranshi”, Servisionan di Gobièrnu ku ta eksigí un registro di adrès i tambe empresanan di utilidat.

Pa informashon tokante monumento (kiko ta un monumento? Kiko ta derechi i debernan di un doño di monumento, etc.), klek aki.

Pa kada aktividat di konstrukshon na òf den un monumento protehá, mester pidi tantu un pèrmit di konstrukshon komo un “monumentenvergunning”, konforme Monumentenverordening, artíkulo 8. Pa basha un monumento protehá kompletamente òf parsialmente abou tambe mester pidi un “monumentenvergunning”. Petishon pa un “monumentenvergunning” mester wòrdu entregá na Stichting Monumentenfonds, Scharlooweg 51.

Klek aki (https://www.monumentenfonds.org/documenten) pa mas informashon tokante kon pa pidi un “monumentenvergunning”.

Rekisitonan pa por hasi petishon pa un pèrmit di konstrukshon:

Kasonan general

 * Mester entregá 2 kopia di mapanan di konstrukshon si ta trata di un kas òf un konstrukshon den kurá di un kas eksistente. Den otro kasonan mester entregá 3 kopia di e mapa di konstrukshon. Tur mapa mester ta pintá riba un skal di 1:100 i mester indiká e siguiente partinan di e konstrukshon: mapa di partishon (“plattegrond”), fundeshi/ riolering, plan di dak, tur fachada i sekshonnan (“doorsnedes”).

* E montante di “Leges” ta wòrdu fihá a base di e balor di konstrukshon kalkulá, konforme Eilandsverordening leges, precariorechten en retributies artikulo 21 (link). Por paga esaki solamente dor di swipe na bali di Servisio pa Planifikashon Urbano (ROP) òf mediante un komprobante ku a depositá e pago na banko òf via online banking riba number di kuenta 31967701 na Maduro & Curiel’s Bank.

Ta kalkulá e montante di leges di e siguiente forma:

1. kalkulá balor di konstrukshon;
2. determiná den kua kategoria di leges (òf adelanto (“voorschot”)) e balor di konstrukshon ta kai usando e tablanan 1 i 2 (por ehèmpel si e balor di konstrukshon ta NAf 150.000, e ta kai den kategoria 4);
3. nota e montante fiho ku ta pertenesé na e kategoria en kuestion (kategoria 4: NAf 490);
4. kalkulá e diferensia entre e balor di konstrukshon i e montante inisial ku ta pertenesé na e kategoria en kuestion (NAf 150.000 – NAf 70.000,01 = ± NAf 80.000);
5. dividí e diferensia ariba menshoná dor di mil i multipliká e resultado aki ku e promilahe di e kategoria en kuestion ((NAf 80.000 : 1000) x 8 = NAf 640)
6. stipulá e montante di “leges” (òf “voorschot”) dor di konta resultado di e multiplikashon i e montante fiho (“leges” = 640 + 490 = NAf 1130)

Tabla 1 Adelanto (“voorschot”) riba leges

Tabla 2 Leges

Kasonan partikular

Kas di F.K.P.

Ta rekomendabel pa mapa di konstrukshon di kasnan ku ta propiedat di F.K.P. tin un stèmpel di F.K.P. i pa e petishon pa pèrmit pa konstrukshon ta kompañá pa un deklarashon di akuerdo por eskrito di F.K.P.

Monumento protehá

Pa por drecha òf modifiká un monumento protehá mester tin tantu un pèrmit pa konstrukshon komo un “monumentenvergunning“. Un “monumentenvergunning” ta nesesario tambe pa por basha un monumento protehá abou. Por entregá petishon pa tur dos e pèrmitnan aki simultáneamente. Petishon pa un “monumentenvergunning” mester wòrdu entregá na Stichting Monumentenfonds, Scharlooweg 51.

Sentro di siudat

Komo ku sentro di siudat ta forma parti di Patrimonio Mundial, e ta un área protehá. P’esei ta konsehabel pa laga Servisio pa Planifikashon Urbano (ROP) evaluá e plan di konstrukshon for di den fase di diseño, promé ku hasi petishon pa pèrmit di konstrukshon. Pa basha un edifisio abou den sentro di siudat, sea kompleto òf parsialmente, un “sloopvergunning (link naar info over sloopvergunning)” ta un eksigensia (EOP artíkulo 4). Petishon pa “sloopvergunning” mester wòrdu entregá na Servisio pa Planifikashon Urbano (ROP).

Pa proyektonan grandi tambe ta konsehabel pa laga Servisio pa Planifikashon Urbano (ROP) evaluá e plan di konstrukshon for di den fase di diseño, promé ku hasi petishon pa pèrmit di konstrukshon. Asina e kliente por sa delantá si mester hasi kambio na e diseño, i esaki lo fasilitá i aselerá e tratamentu di e petishon pa pèrmit di konstrukshon.

Tur petishon pa pèrmit di konstrukshon ta ser evaluá a base di:

• Bouw- en Woningverordening;
• e artíkulo di E.O.P. ku ta konta pa e área konserní;
• e nota “Invulling en vastlegging toetsingsnormen en criteria EOP”;
• plan(nan) aprobá ku ta na vigor pa e área konserní;
• plan di parselashon (“verkavelingsplan”) aprobá, si tin pa e área konserní.

Bouw- en Woningverordening ta duna Servisio pa Planifikashon Urbano (ROP) e derecho pa, na nòmber di Minister, pidi informashon adishonal si esaki resultá nesesario durante tratamentu di un petishon pa pèrmit pa konstrukshon. Tratamentu di un petishon pa pèrmit pa konstrukshon ta dura mas o ménos 6 siman pa petishonnan pa konstrukshon ku un balor di NAf 1 mion òf ménos i mas o ménos 8 siman pa petishonnan pa konstrukshon ku ta bal mas ku NAf 1 mion.

Konstruí sin òf no konforme pèrmit pa konstrukshon ta un delitu kastigabel pa kua bo por wòrdu persiguí pa lei (artíkulo 7, Bouw- en Woningverordening 1935).