Ban bek na Kategoria 1

Outoridat di Aviashon Sivil di Kòrsou ta trahando duru pa
Pone Kòrsou bek den Kategoria 1 bou di reglanan di ICAO

Den yanüari 2012 e Outoridat di Aviashon Sivil Merikano (FAA) a tuma e desishon di degradá Kòrsou pa kategoria 2 a base di un inspekshon ku a hasi na Kòrsou na Sèptèmber 2011. Durante di e inspekshon a resultá ku Kòrsou no tabata kumpliendo ku tur e eksigensianan di aneksonan 1, 6 i 8 di e asina yama tratado di Chicago. E tratado aki tei pa garantisá seguridat di aviashon internashonal.
FAA ta kategorisá paisnan sea ku kategoria 1) kual ta nifiká ku e pais ta kumpli ku tur e eksigensianan òf kategoria 2) kual ta nifiká ku e pais no ta kumpli ku tur e eksigensianan. No ta eksistí un kategoria 3 i ta e pais ta ser degradá i no su aeropuerto.
Den 2003 i den 2008 e Organisashon Internashonal di Aviashon Sivil (ICAO) a hasi inspekshonnan na Kòrsou i for di e tempu ei a konstatá ku Kòrsou no tabata kumpli ku e eksigensianan. Si FAA lo a hasi un inspekshon for di den e añanan ei lo a kategorisá Kòrsou komo kategoria 2.
Outoridat di Aviashon Sivil di Kòrsou ta sigui konta ku e koperashon balioso di tur aktor envolví, tantu den gobièrnu komo pafó di gobièrnu, pa asina garantisá ku nos pais ta bai bek na kategoria 1 mas pronto posibel.