Seguridat di trafiko

Tur dia tin aksidentenan den tráfiko, sea chikitu òf grandi. Si nos tur ban paga mihó tinu den tráfiko, bisti nos faha di seguridat, kore segun e velosidat máksimo permití, no kore i usa alkohòl, i no kore i usa telefon, nos tur ta kontribuí na un tráfiko mas sigur.
Gobièrnu, di su banda, ta tuma pasonan importante pa alsa seguridat den tráfiko. Djis pa menshoná algun lo ta akshonnan manera entre otro:

• hasi kontròlnan di tráfiko rigoroso i regular,
• trese kambionan den infrastruktura por ehèmpel: traha diferente rotònde, pone krusadanan elevá, hasi kamindanan mas smal pa evitá korementu duru, pone vários reflektor (cat eyes) pa halsa visibilidat,
• kùr tur vehíkulo motorista pa sòru ku nan ta kumpli ku reglanan di seguridat

Tur esakinan ku e meta pa stimulá un bon komportashon den tráfiko.
E siman di 21 pa 25 di ougùstùs 2017 tabata siman ofisial di Tráfiko Sigur. Minister Zita Jesus-Leito huntu ku Ministerio di Tráfiko, Transporte i Planifikashon Urbano (VVRP) ta duna atenshon speshal na seguridat den tráfiko. Meta di e siman aki tabata pa konsientisá komunidat riba e importansia di un tráfiko sigur kual nos tur ta forma parti di dje di un òf otro forma.
 Durante di e siman di tráfiko sigur tabata tin un konferensha ku diferente instansia di Gobièrnu, huntu ku stakeholders pa trata e tópiko ampliamente. Tópikonan ku a keda trata ta entre otro: kiko ta seguridat di tráfiko; situashon aktual di nos tráfiko;  transporte públiko; infrastruktura di nos kayanan; medidanan ku a tuma den último 5 aña; mobilidat i planifikashon urbano relashoná ku tráfiko; plannan pa futuro; i hopi mas. Tambe a tuma lugá un diálogo ku tur presente i diskushon di gruponan mas chikitu.