Temporada di orkan 2017

Ounke Kòrsou ta situá na rant di e asina yamá region di orkan, ta keda rekomendá pa pueblo sigui prepará tur aña. Durante di e periodo di 1 di yüni te 30 di novèmber un promedio di diesdos tormenta tropikal i seis orkan ta desaroyá riba Oséano Atlántiko, Golfo di México i Laman Karibe. Pa e motibu aki ta importante pa duna atenshon spesial na kuminsamentu di temporada di orkan na impaktonan di orkan. Tur hende mester tene kuenta ku e efektonan ku un siklon tropikal ta trese kuné, manera bientu hopi fuerte, laman hopi brutu i nivel di awa hopi haltu na kosta. Ademas di esei tambe áwaseru fuerte i di durashon largu, ku por kousa inundashonnan severo.
Medidanan ku por tuma ta aparesé den un foyeto ku Servisio Meteorológiko Korsou (Meteo) a emití i ku por ser di download for di e website di meteo http://www.meteo.cw. Riba e website aki por mira entre otro tambe e último pronóstikonan, atvertensianan, opservashonnan na suela i tambe imágennan di satélite i radar. Mas aleu lo aparesé informashon riba sistemanan di wer signifikante riba página di Facebook di MDC (https://www.facebook.com/Meteorological.Department.Curacao/) i tambe riba e app ku yama Curaçao Weather (http://meteo.cw/about_app.php?Lang=Eng&St=TNCC&Sws=R11) E último adrès aki ta duna vínkulo pa Appstore (iOS) i pa Google Play (Android) for di unda por download e app aki.
Manera ta kustumber, MDC, den koperashon ku National Hurricane Center, lo monitoriá tur siklon tropikal ku ta forma menasa pa su region di responsabilidat (Kòrsou i e espasio aéreo asosiá kuné i tambe e laman ku ta rondoná nos isla). Si ta nesesario MDC lo kuminsá ku emití Boletinnan di Siklon Tropikal (TCB) 72 ora promé ku un posibel menasa. E mensahenan aki tin un kódigo di koló, pa asina ilustrá e seriedat di e menasa.
Meteo ta rekomendá tur hende pa prepará, a pesar di ku ta antisipá un temporada ku ta algu bou di promedio. Manera ya indiká, mester di solamente un tormenta tropikal òf orkan pa yega nos isla, pa hasi esaki un aña destruktivo pa nos komunidat. Den kaso ku nos isla mester wòrdu menasá, ta pidi tur hende pa konsultá solamente mensahenan ofisial, manera esnan emití dor di MDC i tambe dor di Directie Risicobeheersing & Rampenbeleid Curaçao.