Ministerio di Tráfiko, Transporte i Planifikashon Urbano tin awor un Tim di Inspekshon i Kòntròl. E tim aki tin komo tarea pa inspekshoná i kontrolá trabounan di konstrukshon i okupashon di terenonan di gobièrnu. E tim aki ta konsistí di inspektornan ku ta ehersé e trabounan menshoná.

Tim di Inspekshon i Kòntròl di Ministerio di Tráfiko, Transporte i Planifikashon Urbano (VVRP) tin debido atenshon i ta aktua kontra konstrukshon ilegal i okupashon ilegal riba tereno públiko. 

E problematika di okupashon ilegal di tereno i konstrukshon ilegal ta unu di trayektoria largu. Pa años diferente persona a kue tereno di gobièrnu i usa esaki(nan) di forma ilegal òf a konstrui ilegal. Mirando e embergadura di e situashon i e kompleksidat, mester atendé e situashon ku deligensia i segun ku nos leinan di pais ta pèrmití. 

Tin diferente suidadano ku a entregá nan petishon pa legalisashon di tereno okupá ilegal. Esakinan ta den tratamentu aktualmente. Tambe tin diferente suidadano ku a stòp ku konstrukshon ilegal na momentu ku Tim di Inspekshon i Kòntròl di VVRP a atendé ku nan, i nan a kana e kaminda korekto. 

Lamentablemente, tin tambe personanan ku ta siguí hasi aktonan ilegal ku ta kastigabel. Minister Cooper a lanta e Tim di Inspekshon i Kòntròl, ku ta atendé ku tur kaso, inkluso esakinan. E tim aki ya a aktuá i a para varios konstrukshon ilegal, i lo siguí hasi esaki na tur parti di Kòrsou. A atendé diferente kaso den áreanan manera entre otro Montaña Rei, Rooi Santu, Bonam, Ronde Klip, Rust en Pad, Sharo, Buena Vista, Fortuna Ariba, Baya, Jan Sofat, Punda, Brakkeput, Seru di Machu, Fuik, i mas. 

Tim di Inspekshon di Kòntròl di VVRP ta hasi un apelashon na komunidat pa yuda nos vigilá e situashon, i mèldú na momentu ku tuma nota di un posibel kaso di konstrukshon ilegal òf okupashon ilegal di tereno di gobièrnu. Por hasi esaki via di e number di telefon 465-1477. 

Lo sigui aktuá ku man duru pa por para trabounan ku no ta tumando lugá manera mester ta. Esaki ta tuma lugá den estrecho koperashon ku Kuerpo Polisial kaminda ta nesesario. Den sierto kasonan, ta persiguí esnan ku ta hasi nan mes kulpabel di e tipo di aktonan aki di forma penal.

Di e forma aki, por kuminsá yega na un mihó repartishon i maneho di tereno i espasionan públiko na Kòrsou.

Informashon di kontakto:

Pa por tuma kontakto ku Tim di Inspekshon i Kòntròl di VVRP i/òf raportá un posibel kaso di konstrukshon ilegal òf okupashon ilegal di tereno, por yama na 465-1477.

Formulier Verzoek tot Handhaving:

https://vvrp.cw/downloads/26639/?tmstv=1722011034

Formulier (pro forma) Bezwaarschrift: 

https://vvrp.cw/downloads/26644/?tmstv=1722011116

Notisia:

• 7 di mart 2023: Ta para dèmpelmentu di awa ilegal na Jan Sofat.
• 6 di mart 2023: Ta tuma material di konstrukshon ku a keda atras durante trabounan ilegal den kustodia.
• 1 di mart 2023: Atenshon debido pa konstrukshon ilegal i okupashon ilegal di tereno públiko.