Sektor di Infrastruktura i Planifikashon Urbano
Servisio pa Atministrashon i Maneho di Tereno Públiko
Domeinbeheer ta responsabel pa kompra i benta di tereno i konstrukshonnan. Domeinbeheer ta responsabel tambe pa, na un manera optimal, asigná i manehá terenonan públiko, awanan teritorial i bienesnan inmóbil di gobièrnu di Kòrsou.
Domeinbeheer ta duna terenonan públiko na suidadanonan òf kompanianan pa nan por traha kas, pa metanan komersial i industrial, pa metanan turístiko i agrario. Pa hasi esaki, Domeinbeheer, na nòmber di Gobièrnu di Kòrsou, ta kobra erfpagt of hür. Banda di tur esaki, Domeinbeheer ta kontrolá tambe okupashon ilegal di terenonan di gobièrnu i ta aktua si ta nesesario kontra di esaki.
Servisio pa Obra Públiko
Servisio pa Obra Públiko ta sòru pa mantenshon i konstrukshon nobo di infrastruktura físiko (riba tera i bou di tera), fasilidatnan públiko, espasionan públiko i áreanan ‘bèrdè’.
OW ta, den poko palabra, e organisashon di konstrukshon i ingenieria sivil di Kòrsou. E organisashon aki ta responsabel tambe pa atministrashon di e mapa topografiko di Kòrsou, kùrmentu di instalashonnan di koriente, i tambe kùrmentu di ketelnan di stom.
Servisio pa Planifikashon Urbano
Servisio pa Planifikashon Urbano (ROP) ta sòru pa uso duradero i balansa di e espasio di Kòrsou. ROP ta evaluá petishonnan pa desaroyonan urbano nobo i situashonnan aktual pa sòru ku nan ta kumpli nivel di kalidat ku e maneho di Gobièrnu ta stipulá. E responsabilidat di ROP ta konsistí di ordená i duna forma na e espasio públiko di Kòrsou.
Sektor di Tráfiko i Transporte
Servisio Meteorológiko di Kòrsou
Servisio meteorologiko Korsou, miho konosi komo Meteo Kòrsou, ta e sentro di data i konosementu pa loke ta meteorologia, sismologia i klimatologia. Meteo ta e instansia di Gobiernu ku ta saka boletin di wer pa Kòrsou.
Outoridat Marítimo di Kòrsou
Outoridat Marítimo di Kòrsou ta responsabel pa barkunan seif i nabegashon limpi riba laman. Tin tratadonan internashonal ku tur barku tin ku kumpli kuné i MAC ta kontrolá esei.
Servisio pa Tráfiko i Transporte
Servisio pa Trafiko i Transporte ta e organisashon di Gobiernu ku ta duna konseho pa loke ta permitnan pa transporte publiko. E organisashon ta responsabel tambe pa registrashon, dokumentashon I kurmentu di vehikulonan motorisa. Servisio pa Trafiko i Transporte ta parsialmente responsabel tambe pa garantisa un trafiko sigur.
Outoridat di Aviashon Sivil di Kòrsou
Outoridat di Aviashon Sivil di Kòrsou ta sòru pa e struktura i kordinashon di e kuadronan den kual por práktika aviashon na un manera sigur. E organisashon aki ta supervisá kòntròl di tráfiko aéreo, terenonan di aviashon i kumplimentu ku regla. Tur esaki ta wòrdu hasi pa garantisá ku tur operashon, en general i spesífikamente pa loke ta seguridat di aviashon di e kompanianan di aviashon di Kòrsou, ta keda hasi na un manera sigur. Outoridat di Aviashon Sivil di Kòrsou ta supervisá pues tur asuntu ku tin di haber ku seguridat di aviashon pa Kòrsou.