Servisio pa Planifikashon Urbano (ROP) ta sòru pa uso duradero i balansa di e espasio di Kòrsou. ROP ta evaluá petishonnan pa desaroyonan urbano nobo i situashonnan aktual pa sòru ku nan ta kumpli nivel di kalidat ku e maneho di Gobièrnu ta stipulá. E responsabilidat di ROP ta konsistí di ordená i duna forma na e espasio públiko di Kòrsou.

__________________________________________________________________________________________________

Formulario Petishon Permit di Konstrukshon

Dia 27 di yanüari 2023, Gobièrnu di Kòrsou a publiká den ‘Landscourant’ edishon 4 pa 2023. Por wak e dekreto kompletu via di e link aki: https://gobiernu.cw/nl/landscourant/editie-no-04-jaargang-2023/ .

Den e edishon aki di e Landscourant, a publiká tambe e dekreto ministerial titulá: ‘Bekendmaking Ministeriele Beschikking van de 20^ste december 2022, houdende vaststelling van de Nota Invulling en vastlegging toetingsnormen en criteria EOP’. Ku publikashon di e dekreto i nota aki, Gobièrnu di Kòrsou, esta VVRP, ta klarifiká e kuadro di tratamentu di petishonnan pa konstrukshon. Esaki lo ta prinsipalmente den areanan turístiko i di bibienda. Por wak e dekreto i nota korespondiente via di e link aki: https://vvrp.cw/files/2023/05/NR-publicatie-in-Landscourant.pdf

Den kuadro di esaki, ROP ta introdusi un formulario nobo pa petishon pa pèrmit di konstrukshon. Formulario aki ta disponibel na Bali di ROP.

Pa mas informashon por manda mail na info.rop@gobiernu.cw.

___________________________________________________________________________________________________

ROP ta splika proseso pa apliká pa un pèrmit di konstrukshon

 Willemstad – Servisio pa Planifikashon Urbano (ROP) ta duna informashon tokante e proseso di aplikashon di un pèrmit di konstrukshon. Pa apliká pa un pèrmit, mester yena un formulario amplio, i esaki ta disponibel na bali di ROP.

Na momentu ku ta trata petishon pa pèrmit di konstrukshon un kas òf un konstrukshon den kurá di un kas eksistente, huntu ku e formulario, mester entregá 2 kopia di mapanan di konstrukshon. Den otro kasonan, mester entregá 3 kopia di e mapa di konstrukshon.

Tur mapa mester ta pintá riba un skal di 1:100 i mester indiká e siguiente partinan di e konstrukshon:

• mapa di partishon (“plattegrond”),
• fundeshi/ riolering,
• plan di dak,
• tur fachada i sekshonnan (“doorsnedes”),
• i un ‘situatieschets’ 1:500 òf 1:1000.

E lei ‘Bouw en Woningverordening’ ta duna ROP e derecho pa, na nòmber di Minister di Tráfiko, Transporte i Planifikashon Urbano (ROP), pidi e kliente ku a entrega su petishon pa pèrmit, informashon adishonal si ta nesesario durante tratamentu di e petishon.

Tin sierto gastunan mara na e petishon di konstrukshon. Esaki ta konosí komo ‘leges’. E montante di “Leges” ta wòrdu fihá a base di e balor di konstrukshon kalkulá, konforme e lei ‘Eilandsverordening leges, precariorechten en retributies’. Por paga esaki dor di ‘swipe’ na bali di ROP, via un komprobante ku a depositá e montante na banko, òf via online banking riba number di kuenta 31967701 na Maduro & Curiel’s Bank.

Tur petishon pa pèrmit di konstrukshon ta ser evaluá a base di:

• Kòrsou su lei ‘Bouw- en Woningverordening 1935’;
• E artíkulo di Kòrsou su lei ‘Eilandelijke Ontwikkelingsplan (EOP)’ ku ta vigente pa e área konserní;
• Nota “Invulling en vastlegging toetsingsnormen en criteria EOP”;
• Plan (nan) aprobá ku ta na vigor pa e área konserní;
• Plan di parselashon (“verkavelingsplan”) aprobá, si tin pa e área konserní.

Tratamentu di un petishon pa pèrmit pa konstrukshon ta dura mas o ménos 6 siman pa petishonnan pa konstrukshon ku un balor di 1 mion florin òf ménos, i un promedio di 8 siman pa petishonnan pa konstrukshon ku ta bal mas ku 1 mion florin.

Pa un tempu kaba, ROP ta eksperensia diferente reto pa motibu di falta di personal. Diferente petishon ku ta drenta mester di konseho eksterno kual ta alarga e tempu nesesario pa por terminá un petishon ta tuma mas tempu ku mester. ROP ta pidi komprenshon pa esaki.

Konstruí sin òf no konforme pèrmit pa konstrukshon ta un delitu kastigabel pa kual e persona konserní por wòrdu persiguí konforme lei (artíkulo 7, Bouw- en Woningverordening 1935).

Por drenta den kontakto ku ROP via di e-mail na info.rop@gobiernu.cw. Tambe por WhatsApp na 511-3874 pa kualke informashon. Ta hasi máksimo esfuerso pa trata tur petishon òf pregunta mas pronto ku ta posibel.

___________________________________________________________________________________________________

Publikashon di informashon di tur pèrmit di konstrukshon

Servisio pa Planifikashon Urbano (ROP) ta publiká informashon di tur pèrmit ku wòrdu atendé. Pa medio di e publikashon nan aki ta mantené un i tur informá, di lokual ta tuma lugá den nan bisindario den e área di planifikashon urbano.

Tur djaluna lo publiká informashon di e siman ku a pasa. Interesadonan por kuminsá un trayekto hurídiko kontra di e desishon konforme LAR, denter di 6 siman despues di e fecha ku e pèrmit a wòrdu otorgá. Interesadonan por skohe pa entrega un opheshon sea por eskrito dirigí na Minister di VVRP, Seru di Arrarat Parsela C  òf via di e-mail na bezwaarschriften.vvrp@gobiernu.cw.

Tambe interesadonan por skohe pa hasi apelashon direktamente na korte di promé instansia, adrès ta Wilhelminaplein 4, Willemstad Curaçao.

Miéntras ku tin un trayekto hurídiko andando, e pèrmit di konstrukshon ta irevokabel. Teniendo na kuenta ku tin 6 siman di tempu despues ku e pèrmit keda otorgá pa interesadonan hasi un apelashon òf entrega un opheshon, Servisio pa Planifikashon Urbano ta informá ku konstrukshon denter di e trayekto hurídiko ta riba propio responsabilidat.