Mi por laga un otro persona tuma mi pèrmit pa mi?
Pa por tuma un pèrmit, e representante di e doño di pèrmit mester mustra aparte di su propio identifikashon, identifikashon di e doño di pèrmit i un karta di outorisashon firmá pa e doño di pèrmit.
Den kua orario mi por entregá un petishon òf bin tuma mi pèrmit?
Entre 8or pa 11.30or di mainta Servisio pa Planifikashon Urbano (ROP) ta duna tur servisio ku ta inkluí un òf otro forma di transakshon finansiero, manera pago di leges i precario. Parti atardi Servisio pa Planifikashon Urbano (ROP) su kaha ta será pa publiko.
Ki medio di pago Servisio pa Planifikashon Urbano (ROP)ta aseptá?
Por paga solamente dor di swipe na bali di Servisio pa Planifikashon Urbano (ROP) òf mediante un komprobante di ku a depositá e pago na banko òf via online banking riba number di kuenta 31967701 na Maduro & Curiel’s Bank.
Di ki forma mi por reakshoná riba e servisio ku mi a risibí?
Por entregá keho via vvrp.cw.
Ki ora mi ta bin na remarke pa haña un number di kas?
Un konstrukshon ku ta situá na un kaya ku tin nòmber i ku ta den fase final di konstrukshon òf ku ya ta habitá mester haña number di kas. Pa mas informashon, klek aki
Kiko ta e sistema geokódigo di Kòrsou, i unda mi por haña mas informashon tokante esaki?
Klek aki pa informashon tokante e sistema geokódigo.
Mi ke kambia e funshon di mi kas pa empresa. Kiko mi mester hasi?
Pa esaki lo bo mester entrega un petishon por eskrito na Servisio pa Planifikashon Urbano (ROP) personalmente òf via e-mail na info.rop@gobiernu.cw. Banda di bo informashon di kontakto i e adrès dje edifisio, inkluí tambe den e petishon un mapa (“situatieschets”) ku ta indiká unda e edifisio ta situá i tambe un mapa di repartishon (“plattegrond”) dje edifisio. Si ta bai remodelá òf ekspandé e konstrukshon, lo bo mester pidi tambe un pèrmit di konstrukshon.
Kon largu ta dura pa mi haña mi registrashon di adrès?
Esaki ta dura mas o ménos 4 siman.
Mi a pèrdè mi komprobante di registrashon di adrès. Mi por haña un kopia?
Si, bo por haña un kopia. Konforme Eilandsverordening leges, precariorechten en retributies (link) artíkulo 5, insiso 1, mester paga NAf 7,50 pa un kopia.
Kon mi por sa si un edifisio ta un monumento protehá?
Tur monumento protehá ta registrá riba www.curacaomonuments.org. Riba e website tin un mapa riba kua bo por wak si e edifisio konserní ta un monumento si òf no.
Kiko mi mester hasi pa por haña supsidio pa drecha mi monumento?
Bo por haña informashon tokante supsidio pa monumento riba e website di Monumentenfonds, www.monumentenfonds.org.
Kon largu tratamentu di un petishon pa pèrmit di konstrukshon ta dura?
Ta dura mas o ménos 6 siman pa trata petishonnan pa konstrukshon ku un balor di NAf 1 mion of menos, i mas o ménos 8 siman pa petishonnan pa konstrukshon ku ta bal mas ku NAf 1 mion. Pa petishonnan di índole mas kompliká, tratamentu di un petishon por dura mas largu ku 8 siman. Ta trata aki di petishonnan pa entre otro: konstrukshon ku ta desviá for di reglanan vigente manera stipulashonnan di Bouw- en Woningverordening, stipulashonnan di EOP, stipulashonnan di e plan di parselashon, kondishonnan di akta di erfpacht òf kondishonnan di kombenio di hür di Domeinbeheer, konstrukshon ku ta rekerí evaluashon di otro departamento manera Brandweer, Servisio pa Obra Públiko (OW) i Domeinbeheer, konstrukshon ku ta rekerí otro pèrmit manera “Aanlegvergunning”, “Monumentenvergunning” i “Hindervergunning”.
Kiko mi mester trese pa mi por tuma mi pèrmit?
Pa por tuma un pèrmit e pididó di pèrmit mester mustra un medio di identifikashon bálido, e mester paga e diferensia entre di e leges total i e voorschot (e último aki ta e suma ku e pididó di pèrmit a paga na momento ku el a entregá e petishon), i tambe e mester trese un stampia (plakzegel) di NAf 10 na Servisio pa Planifikashon Urbano (ROP).
Kuantu tempu un pèrmit di konstrukshon ta keda bálido?
Un pèrmit di konstrukshon ta duna e doño di pèrmit derecho pa konstruí solamente un biaha. Si akaso e konstrukshon pa kual a otorgá pèrmit bai pèrdí, p.e. dor di kandela, e pèrmit bieu no por ser usá pa konstruí di nobo (tampoko si ta trata di un konstrukshon idéntiko). Pa por (re)konstruí, e persona mester pidi un pèrmit nobo.
Mi por hasi uso di mi pèrmit pa konstruí riba un otro tereno?
No, un pèrmit ta mará na e tereno riba kual Servisio pa Planifikashon Urbano (ROP) a duna pèrmit pa konstruí i no por wòrdu usá pa konstruí riba un otro tereno. Ta posibel si pa traspasá e pèrmit pa un otro persona ku por usa e pèrmit pa konstruí (e edifisio aprobá) riba e mesun tereno na kual e pèrmit ta mará.
Gobièrnu por hala un pèrmit di konstrukshon aden?
Konforme artíkulo 29 di Bouw- en Woningverordening (link), Gobièrnu ta outorisá pa hala un pèrmit di konstrukshon aden.
Mi por remplasá mapa di konstrukshon di un petishon ku ta den tratamentu?
Un pididó di pèrmit por remplasá plannan di konstrukshon di un petishon ku ta den tratamentu sin ningun gastu adishonal. E posibilidat aki sinembargo ta kaduká asina e petishon pa pèrmit ser honrá. Konforme artíkulo 21 di Eilandsverordening leges, precariorechten en retributies (link), e pididó di pèrmit ta obligá pa paga leges di un pèrmit ku a ser honrá.
Mi por modifiká mapa di konstrukshon di un pèrmit di konstrukshon?
Doño di un pèrmit no por, riba su mes, modifiká òf remplasá mapa di konstrukshon ku ta pertenesé na un pèrmit di konstrukshon ku a keda otorgá. Konstruí no konforme di e mapa di konstrukshon ku ta pertenesé na e pèrmit di konstrukshon ta un infrakshon kontra di artíkulo 7, sub c, di Bouw- en Woningverordening (link). Pa por hasi kualke modifikashon na e mapanan òf pa por remplasá nan, e doño mester apliká pa un pèrmit di konstrukshon pa e partinan ku e kier kambia.
Mi por hala un petishon pa pèrmit di konstrukshon ku ta den tratamentu aden?
Un pididó di pèrmit por kanselá un petishon ku ta den tratamentu na kualke momentu. Servisio pa Planifikashon Urbano (ROP) lo debolbé na dje òf na su apoderado tur dokumento risibí i e plaka di “voorschot”. Tantu kliente komo eventual apoderado mester identifiká su mes. Un apoderado mester presentá un karta di outorisashon firmá pa e pididó di pèrmit.
Ken mi por yama pa buska informashon tokante tratamentu di mi petishon?
Por yama na number di telefòn 4333200 òf manda un e-mail na info.rop@gobiernu.cw.
Mi por paga leges den parti, òf mester pag’e kompleto?
E lei ku ta regla leges, esta Eilandsverordening leges, precariorechten en retributies (link), no ta duna posibilidat pa paga leges den parti. E ta preskribí ku mester paga un adelanto (“voorschot”) na momento di entrega e petishon pa pèrmit, i sobrá na momento ku e pèrmit ta kla.
Mi ke entrega un petishon pa pèrmit di konstrukshon komersial. Kiko mi mester hasi?
E proseso ta meskos ku petishon pa pèrmit di konstrukshon residensial. Klek aki (link naar Pèrmit di Konstrukshon) pa mas informashon. Na momento ku ta pidi un pèrmit pa konstrukshon di un edifisio komersial mester tene kuenta si ku e pèrmit ta solamente pa konstruí i ku no por start e negoshi sin e otro pèrmitnan nesesario, manera por ehèmpel pèrmit komersial di Ministerio di Ekonomia. Pues ta bon pa informá promé si lo bo bin na remarke pa risibí e pèrmit nan nesesario pa start e negoshi.
Kon haltu un kurá di blòki por ta sin ku mester pidi pèrmit di konstrukshon?
Pa traha un kura di blòki ku ta mas haltu ku 1,5 meter, mester pidi un pèrmit di konstrukshon.
Kon mi por sa si mi bisiña ta konstruí segun su pèrmit di konstrukshon?
Por hasi petishon pa wak un pèrmit di konstrukshon otorgá. Mester hasi e petishon na Bentana di Informashon, i nan lo manda esaki pa Servisio pa Planifikashon Urbano (ROP) pa por prosesá esaki i lo tuma kontakto ku bo pa pasa i wak e dokumento.
Mi bisiña ta konstruyendo hopi serka di e kurá entre ami ku n’e. Kiko mi mester hasi?
Ta permití pa konstruí riba kurá solamente si ta trata di un edifisio sekundario (“berghok”, kamber pa kriá, kouchi pa bestia, etc.) i te ku un largura total máksimo di 10 meter. Si bo ta konstatá ku e bisiña no ta konstruyendo konforme e regla aki, bo por tuma kontakto ku tim di “Handhaving” na 465-1477.
Mi a pèrdè mi pèrmit. Mi por haña un kopia?
Si, bo por haña un kopia. Konforme Eilandsverordening leges, precariorechten en retributies (link) artíkulo 5, insiso 1, mester paga NAf 7,50 pa un kopia.
Mi ta kla pa kuminsá konstruí. Un inspektor mester bin wak, of mi por dal bai numa?
Si, na momento ku bo a marka e fundeshi, un inspektor mester bin kontrolá si e ta marká konforme e pèrmit otorgá, promé ku kuminsá koba e fundeshi. Por yama ROP na 433-3200 pa un inspektor por bin kontrolá of manda un e-mail na info.rop@gobiernu.cw.