Servisio pa Obra Públiko OW ta e organisashon di gobièrnu ku ta responsabel pa kùr tur instalashon di koriente na Kòrsou. OW ta hasi e tarea aki pa garantisá
seguridat di e instalashonnan di koriente.
Proseso pa haña koriente
Na momentu ku un persona òf kompania ta bai traha un edifisio òf un kas, òf e ta bai ekspandé un konstrukshon eksistente i esaki tin mester di koriente, e doño mester laga diseñá e instalashon di koriente.
Esaki mester sosodé dor di un persona ku Gobièrnu ta kualifiká komo kapas pa hasi e trabou di diseño di instalashon di koriente. Nos ta yama un persona asina un INSTALADO rekonosé. E instalado ta yuda e doño di edifisio pa kana e kaminda pa e por yega na pone koriente. E instalado ta yena un formulario di kùr (keuringskaart) ku doño tambe mester firma i hib’é pa Aqualectra.
Despues ku Aqualectra a prosesá e formulario, e ta wòrdu manda pa OW. E instalado ta pidi un sita na OW pa laga hasi un inspekshon di e instalashon di koriente. Si e instalashon ta bon, e doño ta haña un komprobante di e instalado.
Ku e komprobante aki, e doño por pidi koriente serka Aqualectra.
Trabou i proseso di inspekshon
Tin diferente persona i/òf kompania na Kòrsou ta hasi e trabou di instalashon di koriente den edifisio i kasnan ku òf sin un INSTALADO rekonosé.
Un instalashon eléktriko mester keda hasi dor di un instalado rekonosé dor di Gobièrnu, segun e reglanan di e lei PB.1930 nr.32 ku OW ta apliká. E doño di e kas òf edifisio semper mester puntra pa wak si e INSTALADO ta un instalado rekonosé dor di OW. Semper por yama OW òf wak e lista di instaladonan rekonosé dor di OW. E lista ta disponibel aki. E instalado ta responsabel pa e
trabou ku el a presta. E lei tokante e reglanan di instalashon di koriente ta disponibel aki.
Despues ku e instalado kaba di instalá koriente den e edifisio òf kas i e keuringskaart a yega OW, e instalado ta traha un sita ku OW. Despues di esaki, e tin ku paga pa e gastunan relashoná ku e instalashon di koriente. OW ta mantené 4 tarifa, esta 50, 100, 150 òf 250 florin kual ta dependé di e grandura di e instalashon. Pa instalashon hopi grandi lo por multipliká e tarifa menshoná. OW
ta determiná esaki.
Dia di e sita un inspektor di OW, huntu ku Aqualectra i e instalado ta bai hasi un inspekshon di e trabounan. Durante di e trabounan aki ta tene kuenta ku e pintura(tekening) ku a wòrdu diseñá kual ta basa riba e reglanan vigente. Tambe ta midi e instalashon pa wak si e instalashon ta “safe”.
- Si tin detayenan di e instalashon ku no ta na òrdu, e inspektor ta bisa e instalado ku a hasi e instalashon. E instalado e or’ei, mester drecha tur punto ku konstatá. E instalado aki, mester drecha tur kos i despues traha un sita nobo pa OW i Aqualectra bin kontrolá atrobe. Por tin gastunan envolví. Esaki ta dependé di grado di fayo.
- Si tur kos ta bon, e inspektornan di OW i Aqualectra ta stèmpel i firma e formulario di inspekshon(keuringskaart). E instalado ta entrega esaki na e doño di edifisio pa e por bai pidi Aqualetra koriente.
Pa mas informashon tokante instalashon di koriente por tuma kontakto ku OW via di number di telefon 433-4336