Home | FAQ

FAQ

Sektor di Infrastruktura i Planifikashon Urbano

Servisio pa Atministrashon i Maneho di Tereno

adrès, tarea i produktonan

Kon mi ta hasi haña un tereno di gobièrnu pa mi usa pa traha kas/komersial/agrikultura?
Un persona ku ke bini na remarke pa un tereno di Gobièrnu mester yena un formulario di registrashon. Na momentu ku un persona registrá, su petishon ta bai riba e lista di espera di Domeinbeheer.

Servisio pa Planifikashon Urbano

adrès, tarea i produktonan

Ki medio di pago mi por usa ora ta trata permit pa konstrukshon?
ROP ta aseptá prueba di depósito na Girobank. Mester tuma un formulario pa esaki promé na ROP. Por swipe tambe.
Kuantu tempu un pèrmit di konstrukshon ta keda bálido?
Un pèrmit di konstrukshon ta duna e doño di e pèrmit derecho pa konstrui solamente un biaha! Si akaso e konstrukshon pa kua a otorgá pèrmit bai pèrdí, por ehèmpel dor di kandela, no por usa e pèrmit bieu pa konstruí di nobo. (tampoko si ta trata di un konstrukshon idéntiko). Pa por (re)konstruí mester pidi un pèrmit nobo
Mi por hasi uso di mi pèrmit pa konstruí riba un otro tereno ku no ta esun ku ma pidi pe?
No, un pèrmit ta mará na e tereno pa kua ROP a duna e pèrmit pa konstruí i no por usé pa konstruí riba un otro tereno. Loke sí ta posibel ta pa traspasá e pèrmit pa un otro persona ku por usa e pèrmit pa konstruí (e edifisio aprobá) riba e tereno na kua e pèrmit ta mará.
Kuantu tempu ta dura pa mi haña mi pèrmit?
± 6 siman pa petishon pa konstrukshon ku un balor di NAƒ. 1 mion òf ménos
± 8 siman pa petishon pa konstrukshon ku ta bal mas ku NAƒ. 1 mion
Pa petishon di índole mas kompliká, tratamentu di un petishon por dura mas largu ku 8 siman.
Ki ora mi por entregá un petishon òf bin tuma mi permit?

Orarionan

8.00 – 11.30 i di 14.00 – 15.30 pa tur servisio ku ta inkluí un òf otro forma
di transakshon finansiero (den kaso di pèrmit di konstrukshon, esaki ta pago di leges).
Djabièrnè atardi bali ta sera.

Kon mi ta hasi haña un number di kas?
Un konstrukshon ku ta situá na un kaya ku tin nòmber i ku ta den fase final di konstrukshon òf ku ya ta habitá mester haña number di kas. Doño di konstrukshon por pidi e kontrolür di ROP enkargá ku su rayón un number di kas. Kontra pago di NAƒ. 12,50, ROP ta duna e kliente un number di kas. Ku e resibu e mester bai registra su adrès na Kranshi i apliká pa servisio òf konekshon riba ret di kompania di utilidat. Konstrukshon sekundario (pe. kas pa kría òf espasio pa warda kos) no ta bin na remarke pa number di kas.

Servisio pa Obra Públiko

adrès, tarea i produktonan

Ma tuma nota di un kaya ku ta den mal estado. Unda mi por yama pa indiká esei?
Un persona ku tuma nota di un karetera ku ta den un estado malu, por tuma kontakto ku Servisio pa Obra Públiko via di e-mail info.vvrp@gobiernu.cw. Servisio pa Obra Públiko ta bai analisá e situashon i lo drecha e karetera/kaminda mas pronto ku ta posibel.
Dikon hopi biaha ta lapi e kayanan ku tin buraku i no ta drecha e kaya mesora?
Motibu pa esaki ta relashoná ku e presupuesto i plan di gobièrnu pa mantenshon struktural di kayanan. Ta yena e burakunan si pa asina evitá ku nan ta forma un peliger pa tráfiko i tambe pa no kousa daño na vehíkulonan.
Den otro kasonan, manera riba kamindanan di tera, gobièrnu por laga basha un kapa di asfalt fini pa aliviá e habitantenan di tantu stof i tera.
Ken tin ku mantené e lusnan di kaya?
Na momentu ku ta bai konstruí infrastruktura pa un área nobo òf ta bai drecha un área eksistente, Servisio pa Obra Públiko ta plania ponementu i konstrukshon di mobilario di kaya. Esaki ta sosodé a base di un plan pa e área konserní.
E bòrchi ku e nòmber di mi kaya riba dje ta tur kibra/bieu. Ken mi por bisa pa nan bin drech’é?
Mester tuma kontakto ku OW via telefòn 433-4123 òf via mail info.vvrp@gobiernu.cw
Servisio pa Obra Públiko ta registrá e daño hasi i ta drecha e bòrchi mas pronto ku ta posibel.
Mi a kai ku mi vehíkulo den un buraku i kibra mi tayer. Kiko mi mester hasi awó?
Den un kaso asinaki bo por bini na remarke pa un kompensashon. Di e forma aki bo por kubri e gastunan di e daño hasí na bo vehíkulo.
Ounke, tin kondishon pa bini na remarke pa e kompensashon aki. Por tuma kontakto ku OW via di number di telefon 433-4123 òf e-mail info.vvrp@gobiernu.cw pa hasi un petishon pa bini na remarke pa un kompensashon.

Sektor di Tráfiko i Transporte

Servisio pa Tráfiko i Transporte

adrès, tarea i produktonan

Kon mi tin ku kùr mi outo? Mi tin ku traha sita?
Si. Pa kùr mi outo mi mester traha un sita via Bentana di Informashon.
Via telefòn: 0800-1515 (gratis) i 433-3123
Via email: sita@gobiernu.cw
Informashon nesesario pa traha e sita ta:

  1. Number di e vehíkulo
  2. Nòmber di doño di e vehíkulo
  3. Informashon tékniko di e vehíkulo: Marka, Modèl i aña;
  4. Si ta nesesario Voertuig Identificatienummer (VIN) òf number di chasis

Bo ta risibí un mail bek ku ta konfirmá e sita ku e dia i ora den riba kual ta spera bo.

Unda mi tin ku bai pa kùr mi vehíkulo i kua ta e orarionan?
Riba e dia di e sita bo tin ku presentá na OUVV (antes Keuringslokaal) situá na Parera patras di Selikor. Drenta na e ‘portiershuisje’, lora na man robes sigui bai abou ku e kaya i drenta riba e lugá pa stashoná vehíkulo na man robes. E edifisio ta pegá ku e pòmp di gasolin (kòrda mantené bo orario di sita!).

Orarionan

Djaluna pa djaweps 8:00am – 1:30 pm i 2:00pm – 3:30pm
Djabièrnè 8:00am – 11:30am. Mèrdia ta será

Kiko mi tin ku bin kuné pa kùr e vehíkulo? Ki gastu tin mará na e kùrmentu?
Riba e dia di kùr bo tin ku trese e karchi di kùr ku ta den uso i tambe identifikashon bálido.
Gastunan mará na un karchi nobo ta:
Nafl. 30.00 si e karchi di kur no a kaduká
Nafl. 60.00 si e karchi di kur a kaduká
Nafl. 10.00 pa “herkeuring” denter di 30 dia
Nafl. 30.00 pa “herkeuring” despues di 30 dia
Mester paga e gastunan di inspekshon na bali di ofisina di UOVV na Parera z/n.
Kua ta e promé instansha ku mi mester bai pa registrá mi outo ku ma importá?
E promé fase di importashon ta Duana. Pa medio di esaki, básikamente bo mester paga derecho di importashon òf apliká pa eksonerashon.
Ta konsiderá:
a) Vehíkulo nobo for di fábrika
b) Vehíkulo segunda mano
Mi a bende mi outo i mi ke pas’é pa e doño nobo. Kiko mi tin ku hasi?
kontesta
Kua ta e dokumentonan ku mi mester pa e registrashon?
  • E asina yamá ‘enig document’
  • Dokumento di transportashon (Wegvoeringsdocument)
  • Sédula, reibeweis òf pasport bálido di e bendedó i kumpradó
  • Certificate of conformity
  • ‘Packing list’
  • Karta di inspekshon (Title)
  • Keuringskaart (?)
  • Number di e outo den eksterior den kaso di segunda mano
  • Formulario di registrashon (Certificate of registration) òf un dokumento ofisial prosedente di e outoridat di registrashon di e pais for di kua e outo ta bin
Mi a bende mi outo i mi ke pas’é pa e doño nobo. Kiko mi mester tene kuenta kune?
Promé ku bo kumpra òf bende un vehíkulo motorisá bo mester tene kuenta ku e siguiente aspektonan:
1. Kua ta e último fecha ku bo a paga impuesto pa e vehíkulo konserní?
2. E vehíkulo konserní tin un plachi di number bálido?
3. E vehíkulo konserní tin un keuringskaart?
4. E doño di e vehíkulo konserní ta konosí, alkansabel i por identifik’é?
5. Un banko òf organisashon finansiero no tin derechi di propiedat fidusiario riba e vehíkulo motorisá konserní?
6. Duana no tin restrikshon riba e vehíkulo motorisá?
7. E vehíkulo tin un number di outo speshal?
Kua ta e prosedimentu pa e traspaso tuma lugá?
E prosedimentu ta:

  • E doño di e vehíkulo motorisá mester yena un formulario ros (Landsontvanger)
  • Ku e formulario ros aki ta hasi kontra deklarashon (tegenaangifte) na Landsontvanger, Regentesselaan na Kwartier. Esei ta e eksonerashon.
  • Landsontvanger mester aprobá i stèmpel e formulario
  • Ku un kopia di e formulario di kontra deklarashon for di Landsontvanger e doño òf kumpradó mester akudí na UO Verkeer en Vervoer (UOVV), esta e anterior Keuringslokaal.

UOVV mester risibí e siguiente dokumentonan:

  • E keuringskaart;
  • Un kopia di e kontra deklarashon formulario ku e stèmpel di Landsontvanger;
  • Identifikashon bálido di e doño:

Si e doño ta fayesé:

  • Akta di fayesementu
  • Identifikashon di e famia òf eredero ku ta aktua komo doño
  • Un tèstamènt si ta disponibel

Si e ta konserní un persona hurídiko:

  • Un papel di Kámara Komersio no mas bieu ku 1 aña
  • Un kopia di e persona ku por aktua legal di parti di e persona hurídiko
  • Prueba di outorisashon for di kual por ekstrahé e informashon menshoná
  • Identifikashon bálido di e kumpradó (doño)
Unda mi mester ta si mi a pèrdè mi dokumentonan di vehíkulo?
Bo mester akudí na bali di UOVV (Keuringslokaal) bou di entrega di e dokumentonan disponibel ku por ta: kopianan di keuringskaart, belastingkaart òf dokumento di seguro. Si bo no tin ningun di nan, entrega e number di outo ku e vehíkulo tabata tin delaster biaha òf e nòmber di e doño di e vehíkulo. Si nan no ta disponibel, e number di chasis di e vehíkulo.
Tin hopi aksidente di tráfiko. Dikon? Kiko gobièrnu ta hasi na esaki?
Faltamentu di reglanan di tráfiko manera ekseso di velosidat, pasamentu den lus kòrá, ignorá haltu Ekonomia a desaroyá su mes asta den áreanan kaminda ta hopi habitá. Esei ta un di e motibunan pa kua tin mas trafikashon di vehíkulo motorisá den e áreanan aki. Loke ta Konsekuentemente Gobièrnu Drèmpels, verhoogde kruisingen, rotondes,
Kiko mi mester tene kuenta kune si mi ke pone glas skur na mi outo?
Mester tene kuenta ke ta permití pa plak material riba e glas drechi i robes dilanti kon tal ku 70% di lus por drenta e vehíkulo. Ta prohibí si pa plak material riba e winshil. Tampoko no ta permití pa plak material ku ta reflehá òf blèndu, riba e glas drechi i robes dilanti, e glas patras i e glas drechi i robes patras

Outoridat Marítimo di Kòrsou

adrès, tarea i produktonan

Kuantu barku tin aproksimadamente registrá bou di bandera di Kòrsou?
Aproksimadamente 300
Ki diferensha tin entre Havendienst i Outoridat Marítimo Kòrsou (MAC)?
Havendienst tin di haber ku supervishon i aktividat ku ta tuma lugá den awanan di Kòrsou (binnenwateren) i registrashon di yatenan ku lokalmente ta nabegá pa plaser. Kapitan di Haf (Havenmeester) ta manehá e instansha aki. MAC ta registrá, sertifiká i inspektá barkunan ku ta operá riba nivel internashonal.
MAC ta duna preprashon i kursonan riba tereno marítimo?
Normalmente no. MAC no ta duna kurso spesífikamente riba área marítimo òf nòutiko. De bes en cuando sí, otro organisashonnan ku tin relashon ku MAC ta organisá training basá riba tratadonan marítimo internashonal.
Kiko mester hasi pa registrá un boto?
Esei ta dependé di loke ta usa e boto pe. Si ta pa plaser òf komersial i tambe na unda bo ta bai nabegá kune. Pa informashon mas spesífiko por tuma kontakto ku e departamentu di registrashon na MAC (sra. N. Roemer – Ninoshka.Roemer@gobiernu.cw)
Unda mi mester ta pa un ‘vaarbewijs’?
Si ta un ‘vaarbewijs’ pa nabegá un yate di plaser òf pa nabegá den awanan di Kòrsou (binnenwateren), mester bai na Havendienst.
Si ta trata di un rekonosementu via tratadonan internashonal STCW pa tankero òf bapornan grandi, e ora ei mester akudí na MAC
Kuantu ta kosta pa inspekshoná un boto òf un yate?
No tin un montante spesífiko stipulá pa inspekshon ya ku tin diferente faktor ta hunga un rol. Pa informashon mas ekstenso riba kalkulashon di tarifa di inspekshon por tuma kontakto ku Departamentu di Inspekshon. Tene kuenta si, ku pa hasi kalkulashon tur informashon di e boto òf yate mester ta konosí.
Si mi ke kuminsá nabegá kiko tur mi mester hasi?
Promé ku tur kos hasi un eksaminashon médiko pa sa si e kondishon físiko ta optimal i si ta kualifiká pa nabegá. Ku e prueba di eksaminashon médiko, 2 potrèt, kopia bálido di pasport, werkgeversverklaring (si ta traha).

Servisio Meteorologiko Kòrsou

adrès, tarea i produktonan

E pronóstiko di wer mayoria biaha ta meskos. Kon bin?
Kòrsou tin un klima tropikal i típikamente tin tiki kambio den temperatura i den e tipo di wer ku nos tin aki na Kòrsou. Mayoria parti di tempu, nos wer ta kalor i seku i si awa kai mes, e ta di un karakter hopi lokal i di durashon kòrtiku. Nos no konosé fenómenonan manera sneu ni “mist” i esei ta hasi e pronóstiko hopi meskos tur dia. Ta solamente ora ku tin menasa di sistemanan di mal tempu, manera tormenta tropikal òf orkan, e kos ta bira mas interesante i variá.
Kiko ta nifiká ora tin Kódigo Oraño?
Servisio Meteorológiko Kòrsou ta emití un mensahe di Kódigo Oraño den kaso ku tin un vigilansha (“watch” na ingles) pa sierto fenómeno di wer ku por kousa molèster pa pueblo. E menasa den kasonan asina no ta dje serio ei ainda. E kriterio pa drenta un fase di kódigo oraño ta ku mester tin un posibilidat di 30 pa 50% ku denter di 3 pa 12 ora Kòrsou lo haña sea mal tempu (welek ku bos severo), áwaseru hopi fuerte, bientu hopi duru òf hos. Tin diferente kódigo oraño tambe pa menasa di tormenta tropikal òf orkan. Den e kasonan ei, ta emití esei ora ku un tormenta tropikal òf orkan por pasa hopi serka di Kòrsou denter di 48 ora.
Kiko ta pone un área di preshon haltu forma?
Áreanan di preshon haltu ta forma den mayoria kaso pafó di regionnan ku tin un klima tropikal, manera esun di nos. Den e kaso aki, aire na nivelnan mas haltu di atmósfera (8000 pa 12000 meter haltu) ta bini huntu for di vários direkshon (konvergensha). Esei ta resultá den un akumulashon di aire èkstra den un sierto region. E aire aki ta sak i komprimí i konsekuentemente e ta kenta i seka tambe. E peso di tur e aire aki ta krea un preshon di aire mas haltu na suela kompará ku bisindario i esei nos ta yama un área di preshon haltu. Típikamente tin tiki nubia i wer seku den regionnan influenshá dor di áreanan di preshon haltu.
Kon nos ta prepará pa ora tin un kalamidat?
Ta rekomendá pueblo pa sigui e boletinnan di Meteo ku hopi atenshon via di medionan di komunikashon (radio, televishon i korantnan) i tambe informashon ku otro instanshanan di gobièrnu ta duna, den kaso ku tin menasa di kalamidat, kousá dor di mal tempu. Ademas di esei, por konsultá website di Servisio Meteorológiko Kòrsou, tambe su página di Facebook i mas aleu tambe e app ku yama “Curaçao Weather.” Ta rekomendá tambe pa konsultá e app di “Directie Risicobeheersing en Rampenbeleid,” ku yama Kalamidat. Den buki di telefon di UTS tambe tin algun página ku hopi informashon útil pa sa kon pa prepará espesialmente den kaso di menasa di orkan.
Kon bin ora pronostiká algu di wer no semper e ta sosodé?
Wer ta un fenómeno di naturalesa i no semper ta posibel pa premirá eksaktamente kiko esaki ta bai hasi den un sierto region. Awendia tin modèlnan di kòmpiuter ku ta krea pronóstiko di por ehèmpel áwaseru (ki ora, unda i kuantu?), direkshon i velosidat di bientu, temperatura, etc. Espesialmente pronóstiko di áwaseru ta un reto grandi den nos klima, ya ku awa no ta kai tur kaminda, debí na e karakter hopi lokal di áwaseru serka nos. Awa ta kai hopi biaha riba laman, sin kai riba (parti di) Kòrsou mes. Konsekuensha ta ku wer ta keda seku kasi tur kaminda.
Kon Meteo ta midi e kantidat di awa ku ta kai?
Ta midi e kantidat di awa ku kai ku un aparato ku yama “regenmeter” na hulandes i “rain gauge” na ingles. Na spañó e aparato aki yama “pluviómetro.” Tin dos manera di midi kantidat di awa ku kai:
a. un sistema antikuá, kaminda ku e awa ku kai ta pasa via di un trèktu bai den un “reservoir”. Na dado momentu (na Kòrsou, esei ta 8’or di mainta) ta basha e awa ku a kai, via di un tubu (tùit) den un glas di midí. Ora ku kaba di basha e awa, ta wak via di e midínan riba e glas kuantu awa a kai.
b. un sistema mas moderno ta midi e awa via di un mekanismo ku parse un wep (na ingles e yama “tipping bucket”). E awa ku kai den e kaso aki tambe ta pasa via di un trèktu bai abou i e ta bai resultá den un opheto ku parse un kuchara. Tin dos di e kucharanan ei na kada banda di e wep. Ora ku a kai un sierto kantidat di awa den un kuchara, e peso di e awa ta pone e kuchara aki sak i e otro ta bini ariba i ta kuminsá fangu e awa ku ta kayendo e or’ei. Asin’ei e proseso ta sigui te ora ku awa stòp di kai. Kada biaha ku un kuchara sak i e otro lanta, un mekanismo ta marka ku a kai por ehèmpel 0.1 mm di áwaseru. Via di un konekshon di kabel òf “wireless” e informashon aki ta bai pa sea un kòmpiuter òf un otro aparato spesial riba sierto distansha, unda por lesa mes ora kuantu awa a kai òf ta kayendo.
Kiko ta un seismograf?
Un seismograf ta un aparato ku ta registrá temblor. Dor ku e aparato aki ta kapas di registrá moveshon di suela na un manera hopi eksakto, Pacific Tsunami Warning Center, ku ta responsabel pa Área di Karibe, lo por hasi uso di e datonan aki pa, den kaso ku tin un temblor fuerte, por determiná si tin posibilidat di tsunami den Área di Karibe. Ku e mesun aparato aki ta posibel pa studia e diferente nivelnan bou di tera.

Si abo tin mas pregunta, mail nos libremente na info.vvrp@gmail.com.