Willemstad – Minister ing. Charles Cooper MSc. huntu ku Servisio pa Obra Públiko (OW) riba 1 di mart 2022 a habri e 2 kamindanan nobo den área di Rif. Ta trata aki di e kaminda ku ta konektá rotònde Hamelbergweg ku Mega Pir Tula, i e kaminda ku ta konektá esaki ku e kaya ku ta pasa dilanti di SVB.
E kontratista ku tabata enkargá ku esaki tabata CWM i durante di e inougurashon, Sr. Bonofacio a indiká ku e tambe ta satisfecho di por a finalisá e trabounan aki, apesar di tur kontratempu.
Ekspertonan di OW tambe a guia e proyekto aki for di su diseño te na su finalisashon, i ta kontentu di por terminá otro proyekto pa nos komunidat.
E proyekto aki ta duna realse na e área di Rif, ku sigur ta hañando su forma. Por mira tambe kon Courtyard Marriot ta desaroyá, i e konekshon aki ta na benefisio di e hotèl tambe.
Tambe, ora bo pasa riba e kaminda, bo por tuma nota di e parke di palu di mangel. pueblo di Kòrsou awor por kana tambe riba e alsera di e kaminda aki i disfrutá di e paisahe.
Tur esakinan ta proyektonan ku a keda realisá òf ta realisando den kuadro di ehekushon integral di programa Rif di Ministerio di Trafiko, Transporte i Planifikashon Urbano.
Programa Rif ta un programa ku ta tantu priva komo gubernamental, i ta konsisti di e siguiente proyektonan priva:
- renobashon hotel Renaissance
- konstrukshon di e hotelnan Courtyard Marriot i Corendon.
E projektonan gubernamental nan ta:
- Parkenan di Mangel 1 i 2, k
- konstrukshon di un sistema di riolering (gemaal) nobo i persleiding, i
- e dos kareteranan nobo.
Asina Gobiernu ta duna realse na un Rif di nos tur pa nos tur.