Willemstad – Minister di Tráfiko, Transporte i Planifikashon Urbano, Charles Cooper, huntu ku Servisio di Tráfiko i Transporte Públiko (UO-VV) ta anunsiá ku djaluna 28 febrüari 2022, ta kuminsá ku instalashon di un aparato moderno pa kùrmentu di vehíkulo. Ku instalashon di e aparato aki Keuringslokaal por hasi un chekeo mas efektivo di kada vehíkulo.
E trabounan di instalashon ta kuminsá djaluna awor i lo tin un durashon di un siman. Durante e periodo ku e trabounan ta tuma lugá públiko ku ta bin pa kùr nan vehíkulo lo por sinti algu di molèster. Sinembargo e proseso di kùrmentu ta sigui normalmente. Tur persona ku tin fecha pa kùr nan vehíkulo e dianan aki por hasi esaki sin problema.
Servisio di Tráfiko i Transporte Públiko ta indiká tambe ku esaki ta e promé fase pa loke ta modernisashon di e seshon di kùrmentu di vehíkulo. Mas den transkurso di aña ta spera di por ehekutá e di dos fase ku ta instalashon di mas di e aparatonan aki pa asina e proseso di kùrmentu ta mas efektivo i kompletamente automatisa.
UO-VV ta sigui riba e kaminda di modernisashon pa duna mas i mihó servisio na públiko, ku ta kontribuí tambe na un tráfiko mas sigur.