Willemstad – Minister di Tráfiko, Transporte i Planifikashon Urbano, Charles Cooper, huntu ku Servisio pa Planifikashon Urbano (ROP) a hasi entrega na ofisina di Seru Ararat, di pèrmit di konstrukshon na 2 diferente tipo desaroyo komersial di impakto pa nos pais Kòrsou.
E promé pèrmit ta entregá na Corendon Curaçao, pa konstrukshon di un brùg di metal. E brùg su funshon ta pa temporalmente fasilitá tráfiko di konstrukshon di fase 2 di Corendon pa despues fungi komo entrada i salida pa uso di entidatnan di emergensia na momento di kualke kalamidat na Corendon Hotèl .Tambe e brùg aki lo tin su uso pa e peaton na momento di krusa e parke Mangrove i/òf e áreanan riba Gouveneur van Slobbeweg. Esaki lo rekerí un invershon mínimo di 2.5 mion florin.
E di dos pèrmit ta na Sint Sebastiaan kavel B-15 ku lo risibí nan pèrmit di konstrukshon pa un kompleho di apartamento ku 14 bibienda i lo rekerí un invershon mínimo di 1.4 mion florin.
E konstrukshonnan aki ta kontribuí outomátikamente na un impulso ekonómiko i turístiko grandi pa Kòrsou. E ta duna un impulso na ekonomia dor di kupo di trabou na momento di e konstrukshon i durante di e fase di mantenshon. Minister Charles Cooper ta hopi kontentu ku e desaroyonan aki, ya ku e ta ofresé pais un “boost” ekonómiko.
Pa informashon general por tuma kontakto ku ROP via e number +5999433-3200. Tambe por manda Whats app na number di telefòn +5999511-3874 òf por manda e-mail na info.rop@gobiernu.cw.