Willemstad – Minister Charles Cooper ta selebrá e echo ku riba promé di febrüari 2022, Parlamento di Kòrsou a aprobá e lei Passenger Safey Oversight Charge (PSOC), na hulandes “Luchtvaartveiligheidsheffing”. E lei aki ta introdusí un tarifa adishonal ku tur pasahero ku ta sali for di Kòrsou pa via aéreo mester paga pa kubri gastunan di seguridat den aviashon. E tarifa lo ta mas o ménos 4.50 florin pa kada pasahero, kada bes ku nan sali for di Kòrsou.
E meta di e lei aki ta pa yega na fondo sufisiente pa karga e gastunan anual ku Ministerio di Tráfiko, Transporte i Planifikashon Urbano (VVRP) su Outoridat di Aviashon Sivil mester hasi pa Kòrsou su aviashon por kumpli ku stándartnan internashonal di seguridat di aviashon sivil, stipulá pa e Organisashon Internashonal di Aviashon Sivil (ICAO). Komo ku konekshon aéreo ta di sumo importansha pa nos desaroyo soshal ekonómiko, Kòrsou mester keda kumpli ku e eksigenshanan internashonal aki pa evita deskonfiansa i medidanan di restrikshon di parti di ICAO òf otro paisnan.
Ta pa motibu di no kumplimentu ku e stándartnan aki, na anã e Federashon di Aviashon Merikano (FAA) a kategorisá Kòrsou den kategoria 2. E lei aki ta pues tambe instrumental pa kaba di kana e kaminda pa Kòrsou ta bèk komo un pais kategoria 1.
Algun di e stándarnan internashonal ta enserá un departamentu di aviashon sivil ku ta sólido, ku personal bon ekipá i di train den e último desaroyonan, leinan aktualisá, i mas.
Curacao Airport Partners (CAP) lo ta enkargá pa kobra e rekargo aki, ku lo por ta parti di e pasashi ku e pasahero ta kumpra. CAP ta sòru e or’ei pa pasa e fondonan aki pa kaha di Gobièrnu.
Awor ku e lei aki a risibí aprobashon di parlamento, gobièrnu ta bai hasi e trámitenan pa por implementá esaki i pa e drenta na vigor. Lo traha pa alkansá esaki pa 2022 mes.