E tarea di Outoridat di Aviashon Sivil Kòrsou (CCAA) komo un parti di Ministerio di Tráfiko, Transporte I Planifikashon Urbano ta pa promové un sektor di aviashon ku ta seif i konfiabel.

CCAA ta supervisá e sektor aviashon na Kòrsou i aeroliñanan stranhero ku ta bishita Kòrsou. E Organisashon di Aviashon Sivil Internashonal (ICAO) ta determiná un standard di seguridat global i CCAA ta realisá nan trabou segun e standard aki.

Kòrsou ta dependiente pa gran parti di konekshon di den laira i pa e motibu aki e konektividat ta hopi importante. Seguridat di aviashon ta un di prioridat pa Ministerio di Tráfiko, Transporte i Planifikashon Urbano, pero konfiansa i aksesibilidat di e konekshon den laira tambe ta di gran interes pa prosperidat i desaroyo di e pais.

E kresementu den futuro di aviashon ta pone un preshon haltu riba esun ku ta kontrolá e sektor i pa e motibu aki CCAA ta invertí den personal i rekursonan. Solamente ku un sistema internashonal di vigilansia, ku ta kumpli ku e ‘international standards sector’ aviashon di Kòrsou por desaroyá ma mihó i asina Kòrsou lo keda un isla kaminda turista ta gusta bishita i e invershonnan lo oumentá.

Den próksimo añanan, CCAA lo sigui desaroyá i bira un organisashon ku ta riba nivel internashonal. E koperashon den Reino ta nifiká ku e interkambio mutuo di konosementu i eksperensia por keda garantisá un forma duradero.

Tareanan

• Sertifiká i registrá individuonan i kompanianan di aviashon di Kòrsou i nan avionnan
• Supervisá tur aktividat di aviashon, tantu tékniko komo operashonal;
• Mantené leinan, reglanan i akuerdonan internashonal pa garantisá kalidat i seguridat di aviashon sivil;
• Emití lisensia na pilotonan;
• Konsehá Minister i Tim di Maneho riba tur asuntu di aviashon;
• Sostené e Departamentu di Maneho riba nivel tékniko pa loke ta:
  • Desaroyo di maneho di aviashon stratégiko nashonal;
  • Desaroyo di leinan, reglanan i instrumentonan di aplikashon;
  • Tradusí e maneho di Reino Hulandes i akuerdonan internashonal den maneho nashonal táktiko i operashon.
• Supervisá Dutch Caribbean Air Navigation Service Provider, Aeropuerto Internashonal Hato i kompanianan lokal di aviashon.