Kùrmentu di ketel di stom i tanki di preshon

Servisio pa Obra Públiko ta e organisashon di Gobièrnu di Kòrsou ku ta responsabel pa kùrmentu di ketelnan di stom. Kompanianan manera PDVSA, DOK, Wasserij, Bakerij, Aqualectra ets ta usa ketelnan di stom i tankinan di preshon.

Den un ketel tin hopi energia konsentrá ku ta bou di hopi preshon. Si e material di e ketel no por soportá e preshon ku tin den dje, e ketel por eksplotá. Pa evitá esaki, Servisio pa Obra Públiko mester kùr tur ketel i tanki di stom na Kòrsou. Kùrmentu di ketelnan di stom ta bai segun reglanan di seguridat vigente ku Servisio pa Obra Públiko ta determiná.

Proseso di kùr

Na momentu ku un kompania ke kuminsá usa un ketel di stom i tanki di preshon, e mester tuma kontakto ku Servisio pa Obra Públiko pa e proseso di kùr por kuminsá.

Funshonario nan di Servisio pa Obra Públiko ta traha un sita ku e kompania pa nan bai kontrolá e ketel di stom. Si tin detayenan tékniko pa ku seguridat di e ketel di stom ku no ta bon, e funshonario ta pidi e kompania pa hasi e kambionan nesesario na e mashin. Unabes ku e kompania hasi e kambionan, e funshonario ta regresá pa hasi e kòntròl final i kùr e ketel di stom.

E kompania ta risibí un dokumento komo prueba ku su ketel di stom ta di kùr. E dokumento aki ta válido pa 1 aña. despues di un aña, Servisio pa Obra Públiko mester bolbe bin pa kùr e ketel di stom. E proseso aki ta pa garantisá ku e ketel di stom ta keda den un estado optimal.

Servisio pa Obra Públiko ta manehá un registro di tur ketel di stom ku tin na Kòrsou. Na momentu ku bini un ketel di stom nobo, esaki ta keda registrá mesora. Ora ku un ketel di stom Sali for di servisio, esaki tambe ta keda registrá. Servisio pa Obra Públiko ta vigilá tambe e valides di e dokumento di kùr di kada ketel di stom pa por kontrolá esaki na tempu.