Willemstad – Awe djaluna 16 di mèi 2022 Minister Cooper i su delegashon a hasi su promé bishita di trabou na TNO. Esaki ta e promé di e tantísimo bishitanan ku Minister Cooper lo hasi durante di su estadia di algun dia aya na Hulanda. TNO ta e organisashon hulandes ku ta atendé ku ‘Toegepast Natuurwetenschappelijk Onderzoek’.
TNO ta trata na krea un konekshon entre e investigashonnan fundamental manera Universidatnan ta hasi, i e produkto ku mester ser desaroyá. Nan ta na 25 lokashon na Hulanda. TNO, basá riba e modelo konosí komo ‘digital twin’, a traha un simulashon ku nos mester na Kòrsou pa ku nos situashon di flúho di tráfiko.
Tur e investigashonnan di TNO ta hustamente pa hasi uso di e oportunidatnan ku Kòrsou ta brinda komo ‘hub’ i potenshal den Karibe, i pa evitá ‘brain drain’ di nos hendenan for di Kòrsou.
A amplia riba 4 proyékto, esta E-mobilty, Proyekto Sargassum, E-tugs, i Floating Offshore Wind. Minister Cooper a duna di konosé ku e lo hasi su esfuerso pa atendé e proyéktonan aki den Konseho di Minister i pa logra apuntá un ‘trekker’ pa e proyektonan aki. Tin un ‘Groeifonds’ destiná pa hasi e invershonnan nesesario.
Minister Cooper a keda hopi satisfecho ku tur e bentahanan konkreto ku TNO tin pa Kòrsou, i ta bisa ku nos lo bai hasi mas uzo di TNO i su afiliashon ku Universidat di Kòrsou pa por delineá i ehekutá sierto proyektonan.