Willemstad – Resientemente, Minister Cooper huntu ku Stichting Monumentenfonds Curaçao, a firma un akuerdo pa Domeinbeheer bai hasi uso den futuro di e edifisio di ántes Girobank den Skaló.
E edifisio aki ta un monumento protehá i Domeinbeheer, ku sosten finansiero di Stichting Monumentenfonds, lo renobá i modernisá esaki pa despues muda i bai den dje. Segun plan, esaki lo por tuma lugá pa komienso di 2023.
E aña aki nos Willemstad ta selebrá 25 aña riba lista di Patrimonio Mundial di UNESCO. E echo ku Gobièrnu ta skohe pa bai usa un di su mes edifisionan den nos Sentro di Suidat, ku ta un monumento protehá, ta kontribuí na nos duna realse i mas balor na nos patrimonionan nashonal.
Tambe e mudansa aki, den futuro, lo kontribuí na baha gastunan di hürmentu di edifisio pa ofisina di Domeinbeheer konsiderablemente, mirando ku e edifisio aki ta di gobièrnu.
Banda di esaki, e echo ku Domeinbeheer ta muda bin Skalo ta kontribui na un mihó kolaborashon entre servisionan di e ministerio, mirando ku e lo ta mas serka di ROP (Plasa Horacio Hoyer) i Servisio pa Obra Públiko (Parera).
E proyekto aki tambe lo fortifiká e lasonan di trabou entre VVRP i Monumentenfonds mirando ku nan lo fungí komo konsehero riba tereno di restorashon di monumento.