Willemstad – Ministerio di Tráfiko, Transporte i Planifikashon Urbano huntu ku Servisio pa Planifikashon Urbano (ROP) a hasi entrega di un pèrmit di konstrukshon na Fundashon Kas Popular (FKP) pa konstrukshon di 72 bibienda pa pueblo den e bario di Tera Kòrá. FKP ta risibí un pèrmit di konstrukshon pa konstrukshon di 72 bibienda sosial. Esaki lo wòrdu realisá atraves di konstrukshon di un kompleho di 6 edifisio di kual kada unu tin 3 piso.
E konstrukshon aki tambe ta kontribuí na un impulso ekonómiko i por yuda baha e lista di espera pa e nesesidat di kas pa pueblo. Minister Charles Cooper ta satisfecho ku e desaroyonan aki, mirando ku di e manera aki ta bin mas kas pa pueblo.
Pa informashon general por tuma kontakto ku ROP via e number di telefon +5999 433-3200. Tambe por manda Whats app na number di telefòn +5999 511-3874 òf por manda e-mail na info.rop@gobiernu.cw.