Willemstad – Servisio pa Planifikashon Urbano (ROP) ta informá ku durante aña 2021, e servisio a otorgá un total di 713 pèrmit di konstrukshon. Pa esaki, ROP a kolekshoná un suma di 1.628.893,96 florin na leges. Minister Charles Cooper ta pone trabounan kana i ta satisfecho ku e resultado aki di ROP. Esakinan ta na bienestar di e suidadanonan ku a hasi nan petishon, i pa kaha di gobièrnu.
Den 2022 tambe ROP a sigui traha. Na luna di yanüari so a otorgá 31 pèrmit di konstrukshon ku a suma un total di 198.180,05 florin na leges.
Tur siman ROP ta publiká e lista di pèrmitnan di konstrukshon. Pa e siman di 17 te ku 21 di yanüari 2022, e servisio a otorgá un total di 13 pèrmit di konstrukshon. Por tuma nota di e detayenan via di e website www.vvrp.cw/permit.
ROP ta hasi un apelashon na komunidat pa konstruí na òrdu i semper segun regla pa garantisá un konstrukshon seif.
Pa informashon general por tuma kontakto ku ROP via e number +5999433-3200. Tambe por manda Whats app na number di telefòn +5999511-3874 òf por manda e-mail na info.rop@gobiernu.cw.